Vedat Muriqi në listën e golashënuesve të La Ligës: “Pirati” kosovar shndërrohet në legjendë të Mallorcës
Vedat Muriqi po shkruan një kapitull të ri në karrierën e tij në La Liga. Sulmuesi kosovar, i njohur me nofkën “Pirati”, është bërë një nga lojtarët më vendimtarë të kampionatit spanjoll. Me 14 gola të shënuar këtë sezon, emri i tij shfaqet pranë emrave të mëdhenj si Mbappé, Ferran Torres dhe Lewandowski në listën e golashënuesve.
Në fitoren e fundit 3-2 ndaj Athletic Bilbaos, Muriqi realizoi një tripletë historike, duke u bërë golashënuesi i dytë më i mirë në historinë e Mallorcës me 46 gola. Me këtë arritje, ai kaloi Juan Arangon dhe tani ndodhet vetëm 8 gola larg rekordeve të Samuel Eto’o-s, legjendës që mban rekordin me 54 gola.
Karriera e Muriqit nuk ka qenë gjithmonë lineare. Në Itali, te Lazio, ai shpesh kritikohej si i ngadaltë dhe i paefektiv, me vetëm 2 gola të shënuar nga viti 2020 deri në 2022. Transferimi te Mallorca në janar 2022 për 13 milionë euro shënoi fillimin e një “rinie të dytë” për sulmuesin kosovar, i cili në Spanjë gjeti vazhdimësi, golat dhe pasionin për futbollin që e shoqëron që nga fëmijëria.
Muriqi ka përjetuar sfida të mëdha edhe jashtë fushës. I rritur në Prizren gjatë luftës në Kosovë, ai kujton për La Gazzetta dello Sport: “Na morën sendet me vlerë dhe paratë. Na thanë se do ta bombardonin shtëpinë nëse nuk largoheshim brenda dy orësh. Ishim 50 veta, flinim në bodrum dhe kishim vetëm 2 litra qumësht për të gjithë.” Këto përvoja e formuan, por nuk e ndaluan ëndrrën e tij për të bërë futboll profesional.
Karriera e Muriqit filloi me KF Liria në vitin 2005, përpara se të transferohej në Turqi, ku filloi të afirmohej ndërkombëtarisht. Tripleta ndaj Athletic Bilbaos shënoi momentin e parë të këtij niveli për Mallorcën pas vitit 2008, kur Dani Güiza realizoi një tripletë kundër Real Murcias.
Me formën e tij të jashtëzakonshme këtë sezon, Muriqi po konfirmon se ka arritur të shndërrohet në një nga sulmuesit më të frikshëm të La Ligës dhe një nga figurat kryesore në historinë e klubit spanjoll.
