Gjithçka gati për Kamenica Summer Fest, sonte nis festa më e madhe e verës

Vera në Kamenicë nis sonte me atmosferë festive. Me fillim nga ora 20:00, në Sheshin “Metush Krasniqi”, Komuna e Kamenicës hap zyrtarisht edicionin e katërt të Kamenica Summer Fest 2026, duke shënuar fillimin e një kalendari të pasur me aktivitete që do ta gjallërojnë qytetin gjatë javëve në vazhdim.

Festivali premton një verë të mbushur me muzikë, kulturë, sport, argëtim dhe aktivitete për të gjitha moshat, duke krijuar një hapësirë ku familjet, të rinjtë dhe vizitorët mund të shijojnë mbrëmje plot energji dhe momente të bukura së bashku.

Nga Komuna e Kamenicës është bërë thirrje që qytetarët e Kamenicës, por edhe vizitorët nga e gjithë Kosova, t'i bashkohen natës hapëse dhe të bëhen pjesë e atmosferës që e kthen qytetin në një nga qendrat kryesore të ngjarjeve verore.

Sonte, Kamenica hap dyert për një tjetër verë me kujtime të bukura. Organizatorët ftojnë të gjithë të jenë pjesë e këtij fillimi festiv dhe ta hapin së bashku një edicion që premton shumë emocione, argëtim dhe energji pozitive.