Grupi Minatori dhe Naser Berisha sonte në skenën e “Ditëve të Mërgatës”

Vera në Gjilan po vazhdon me ritëm festiv. Manifestimi tradicional “Ditët e Mërgatës – Rrënjët Tona 2026” ka mbledhur qytetarë, mërgimtarë dhe mysafirë në një javë të mbushur me muzikë, art, teatër, folklor dhe argëtim, duke e shndërruar qytetin në një pikëtakim të kulturës dhe traditës.

Programi vazhdon më 28 korrik, duke nisur nga ora 20:00 në Sheshin “Agim Ramadani” – Platoja e Teatrit, ku publiku do të ketë mundësi të ndjekë koncertin me Grupin Minatori dhe Naser Berishën, ndërsa mbrëmja do të vazhdojë me program muzikor nga Dj Fisoo.

Një ditë më vonë, më 29 korrik, skena do t’i kushtohet trashëgimisë shqiptare përmes një mbrëmjeje folklorike e muzikore. Para publikut do të performojnë Ilir Shaqiri, Kastriot Tusha, Nikollë Nikprelaj, Selami Kolonja, Enkelejda Arifi, Hysni Alushi, si dhe Ansambli “Krahu i Shqiponjës” nga Vlora.

Në mesin e aktiviteteve më të shumëpritura është koncerti “N’Karadak Krisin Tupanat”, që mbahet më 30 korrik. Kjo mbrëmje do të bashkojë në Gjilan ansamble kulturore nga 12 shtete, të cilat do të prezantojnë valle, muzikë dhe tradita nga vende të ndryshme, duke i dhënë festivalit një karakter ndërkombëtar.