Si përcaktohen çmimet e biletave të koncerteve: “shkenca” pas turneve botërore

Për fansat, çmimi i një bilete koncerti duket i thjeshtë: një shifër në ekran dhe kaq. Por pas saj qëndron një proces i gjatë dhe i strukturuar që përfshin analiza të tregut, parashikim të kërkesës dhe modele të avancuara ekonomike. Në industrinë e muzikës live, çmimi nuk vendoset rastësisht.

Ekipet e artistëve fillimisht analizojnë kërkesën. Shikohen të dhëna si numri i dëgjimeve në platforma streaming, angazhimi në rrjete sociale dhe historiku i shitjeve në turne të mëparshme. Kjo ndihmon të kuptohet sa i madh është interesimi në çdo qytet dhe sa njerëz janë të gatshëm të paguajnë për një koncert.

Më pas vjen ndarja e audiencës në grupe të ndryshme. Fansat më të dedikuar zakonisht paguajnë më shumë për vende VIP apo paketa speciale, ndërsa të tjerët synojnë biletat standarde. Ky sistem njihet si “price discrimination”, ku një koncert i vetëm ka disa nivele çmimesh për të maksimizuar të ardhurat pa humbur audiencën.

Një rol gjithnjë e më të madh po luan edhe “dynamic pricing”. Kjo do të thotë se çmimi i biletës mund të ndryshojë në kohë reale, në varësi të kërkesës. Nëse biletat shiten shpejt, çmimi rritet. Nëse kërkesa bie, mund të ulet. Ky sistem përdoret edhe në industrinë e aviacionit dhe hotelerisë.