Duran Duran rikthejnë magjinë e viteve ’80, më 2 korrik koncert në Shkup

Ka disa grupe që nuk plaken kurrë dhe Duran Duran është një prej tyre. Më 2 korrik, legjendat britanike do të mbërrijnë në Shkup për një koncert që pritet të mbledhë mijëra adhurues nga i gjithë rajoni. Spektakli do të nisë në orën 21:00 në Arenën “Boris Trajkovski”.

Publiku do të ketë mundësinë të këndojë së bashku hite që kanë lënë gjurmë në historinë e muzikës, si "Hungry Like the Wolf", "Rio", "Come Undone", "Girls on Film", "Ordinary World" dhe "Notorious". Grupi do të prezantojë edhe këngë nga albumi i tyre më i fundit, "Danse Macabre", duke ndërthurur nostalgjinë me tingujt e rinj.

Me mbi 40 vite karrierë dhe më shumë se 100 milionë albume të shitura në mbarë botën, Duran Duran vazhdojnë të mbeten një nga emrat më të mëdhenj të muzikës. Pas një turneu të suksesshëm ndërkombëtar dhe përfshirjes në Rock & Roll Hall of Fame, koncerti në Shkup pritet të jetë një nga ngjarjet muzikore më të rëndësishme të kësaj vere. Biletat janë tashmë në shitje.