Bryan Adams ngjitet sonte në skenën e Prishtinës, gjithçka gati për koncertin e shumëpritur

Mbrëmja e sotme pritet të jetë e veçantë për adhuruesit e muzikës në Kosovë. Bryan Adams do të ngjitet për herë të parë në skenën e Prishtinës, duke sjellë koncertin e tij akustik “The Bare Bones” në sallën “1 Tetori”. Atmosfera është gati dhe interesimi i publikut ka qenë i madh.

Koncerti premton një përvojë ndryshe nga shfaqjet e zakonshme. Me vetëm kitarën, pianon dhe zërin e tij karakteristik, Bryan Adams do të interpretojë disa nga këngët më të njohura të karrierës së tij, si "Summer of '69", "Heaven", "Run to You" dhe "Everything I Do (I Do It for You)".

Me një karrierë që zgjat prej dekadash, fituesi i çmimit Grammy vazhdon të mbetet një nga emrat më të mëdhenj të muzikës rock. Në Prishtinë kanë mbërritur edhe fansa nga vende të ndryshme të rajonit, duke e kthyer koncertin e kësaj mbrëmjeje në një nga ngjarjet muzikore më të rëndësishme të vitit në Kosovë.