“Shame and Money” triumfon në Gjermani, Visar Morina fiton çmimin CineMasters Award

Kinematografia e Kosovës ka shënuar një tjetër sukses në arenën ndërkombëtare. Filmi “Shame and Money”, me regji të regjisorit kosovar Visar Morina, është shpallur fitues i CineMasters Award në edicionin 2026 të Filmfest München, një nga festivalet më të rëndësishme të filmit në Gjermani.

Lajmi u bë publik edhe nga ambasadori i Kosovës në Gjermani, Faruk Ajeti, i cili përgëzoi regjisorin dhe ekipin e filmit për këtë arritje, duke e cilësuar atë një tjetër dëshmi të suksesit të kinematografisë kosovare në skenën ndërkombëtare.

Filmfest München është festivali i dytë më i madh i filmit në Gjermani pas Berlinales dhe çdo vit mbledh producentë, regjisorë, aktorë e profesionistë të industrisë nga e gjithë bota. Çmimi CineMasters Award ndahet për filmat më të spikatur të garës ndërkombëtare dhe konsiderohet një nga vlerësimet më prestigjioze të festivalit. Në edicionin e sivjetëm, filmi i Morinës u vlerësua si fitues i këtij çmimi.

Ky nuk është suksesi i parë ndërkombëtar i filmit. Në fillim të këtij viti, “Shame and Money” fitoi edhe Grand Jury Prize në kategorinë World Cinema Dramatic Competition në Sundance Film Festival, festivali më i rëndësishëm në botë për filmin e pavarur. Ky çmim konsiderohet një nga vlerësimet më të mëdha që mund të marrë një film në këtë kategori dhe ka ndihmuar që vepra e Morinës të tërheqë vëmendjen e kritikëve dhe publikut ndërkombëtar.