Nga sot paga minimale në Kosovë bëhet 500 euro bruto

Që nga sot, 1 korrik, paga minimale në Kosovë është 500 euro bruto, duke shënuar fazën e dytë të zbatimit të vendimit të Qeverisë. Rritja vjen pas ndryshimit të parë, kur më 1 janar të këtij viti paga minimale ishte ngritur në 425 euro bruto.

Vendimi synon të përmirësojë të ardhurat e punëtorëve, por zbatimi i tij mbetet një nga sfidat kryesore. Kryetari i Sindikatës së Punëtorëve të Sektorit Privat, Jusuf Azemi, shpreh shqetësimin se një pjesë e kompanive, veçanërisht ato që kanë kontrata me institucione shtetërore dhe komunale, ende nuk po respektojnë as pagën minimale që ishte në fuqi deri tani.

Nga ana tjetër, Inspektorati Qendror i Punës ka bërë të ditur se do të intensifikojë mbikëqyrjen për të siguruar zbatimin e vendimit. Sipas këtij institucioni, bizneset që nuk respektojnë pagën minimale do të përballen me procedura kundërvajtëse, ndërsa sektorët që konsiderohen me rrezik më të lartë për shkelje mbeten ai i pastrimit dhe sigurisë fizike.

Edhe qytetarët kanë reagime të ndryshme ndaj kësaj rritjeje. Shumë prej tyre e mirëpresin vendimin, por vlerësojnë se 500 euro bruto ende nuk janë të mjaftueshme për të përballuar rritjen e vazhdueshme të kostos së jetesës. Sipas tyre, shpenzimet mujore janë rritur ndjeshëm dhe nevojitet një pagë më e lartë për të siguruar një standard më të mirë jetese.