Rikthehen “Akordet e Kosovës”: Hapet gara për këngëtarët dhe talentet e reja

Një nga emrat më të njohur të skenës muzikore kosovare po hap një kapitull të ri. “Akordet e Kosovës” rikthehen me një identitet të ri vizual dhe me dy gara që synojnë të zbulojnë zëra e krijues të rinj.

Radio Televizioni i Kosovës ka publikuar dizajnin zyrtar të festivalit dhe ka hapur thirrjet për aplikime për edicionin kryesor dhe atë për fëmijë. Në garë mund të marrin pjesë këngëtarë, kompozitorë dhe tekstshkrues nga Kosova, Shqipëria, Maqedonia e Veriut, Mali i Zi, Lugina e Preshevës dhe diaspora.

Krahas festivalit kryesor, “Akordet e Kosovës për Fëmijë” do t’u japë mundësi talenteve të reja nga mosha 9 deri në 14 vjeç që të prezantojnë krijimtarinë e tyre muzikore dhe të bëhen pjesë e një skene të rëndësishme për artistët e rinj.

Të gjithë të interesuarit mund të aplikojnë përmes ueb-faqes zyrtare të RTK-së, duke plotësuar formularin përkatës dhe duke ngarkuar veprën muzikore. Afati i fundit për aplikim është 31 gusht 2026, në orën 23:59.