BQK: Ekonomia e Kosovës pritet të rritet më ngadalë, inflacioni parashihet të arrijë në 6.7%

Raporti vjetor i Bankës Qendrore vlerëson se ekonomia e Kosovës do të vazhdojë të rritet edhe gjatë këtij viti, por me ritëm më të ngadalësuar, ndërsa inflacioni pritet të përshpejtohet.

Banka Qendrore e Kosovës (BQK) ka parashikuar se ekonomia e vendit do të rritet me 3.5% gjatë këtij viti, ndërsa inflacioni mesatar pritet të arrijë në 6.7%. Vlerësimet janë bërë publike në raportin vjetor të institucionit, i cili është miratuar nga Bordi i BQK-së dhe i është dorëzuar Kuvendit të Kosovës.

Sipas raportit, ekonomia e Kosovës vazhdon të mbështetet kryesisht nga konsumi i brendshëm, investimet dhe eksporti i shërbimeve. Megjithatë, ritmi i rritjes ekonomike është ngadalësuar krahasuar me vitet e mëparshme, ndërsa importet e larta kanë ndikuar negativisht në performancën ekonomike.

BQK vlerëson se investimet publike kanë qenë një nga faktorët kryesorë që kanë mbështetur rritjen ekonomike gjatë vitit 2025, ndërsa rritja e vizitave të diasporës ka ndikuar pozitivisht në eksportin e shërbimeve. Në të njëjtën kohë, eksporti i mallrave ka shënuar rënie, ndërsa importi është rritur, duke zgjeruar deficitin tregtar të vendit.