Mbrojtje më e fortë për drunjtë urbanë, ndalohet prerja pa lejen e Ministrisë

Një dru i prerë sot mund të mungojë për dekada. Me këtë ide, Ministria e Mjedisit ka vendosur të forcojë mbrojtjen e drunjve urbanë dhe të hapësirave të gjelbra në të gjithë Kosovën. Vendimi u bë publik nga ministrja në detyrë, Fitore Pacolli.

Sipas vendimit të ri, ndalohet prerja, krasitja ekstreme dhe zhvendosja e drunjve pa pëlqimin paraprak të Ministrisë. Kjo do të thotë se ndërhyrjet në drunjtë urbanë nuk mund të bëhen më vetëm me vendim lokal, por do të kërkojnë edhe miratim institucional.

Në të njëjtën kohë, komunat obligohen të bëjnë inventarizimin e plotë të drunjve urbanë dhe të zbatojnë standarde të qarta për mbrojtjen e tyre. Çdo projekt që prek hapësirat e gjelbra do t’i nënshtrohet procedurave të vlerësimit mjedisor, ndërsa për çdo dru të larguar do të zbatohet parimi “1 me 3”, që nënkupton mbjelljen dhe mirëmbajtjen e tre drunjve të rinj.

Pacolli tha se synimi është i qartë: të mbrohet natyra, të rriten sipërfaqet e gjelbra dhe të ndërtohen qytete më të shëndetshme për brezat e sotëm dhe të ardhshëm. Në një kohë kur temperaturat rriten dhe hapësirat e gjelbra zvogëlohen, ky vendim synon ta bëjë çdo dru më të vlefshëm se më parë.