Zyrtare: Komuna e Gjilanit do të punojë edhe të shtunave gjatë verës

Vera sjell më shumë lëvizje në Gjilan, e bashkë me të edhe më shumë kërkesa për shërbime administrative. Për t'iu përgjigjur këtij fluksi, Komuna e Gjilanit ka vendosur të zgjasë orarin e punës, duke hapur sportelet edhe gjatë ditëve të shtuna.

Sipas njoftimit të Drejtorisë së Administratës së Përgjithshme (DAP), vendimi hyn në fuqi më 4 korrik dhe do të zbatohet deri më 29 gusht 2026. Gjatë kësaj periudhe, qytetarët do të mund të marrin shërbime administrative edhe në fundjavë.

Sportelet do të jenë të hapura çdo të shtunë nga ora 10:00 deri në orën 14:00. Ky orar i veçantë është vendosur për të lehtësuar qasjen në shërbime, sidomos gjatë muajve të verës kur në Gjilan kthehen shumë bashkatdhetarë nga diaspora.

Drejtori i Administratës së Përgjithshme, Elbasan Shabani, tha se ky vendim synon të ofrojë shërbim më efikas dhe më të shpejtë për të gjithë qytetarët gjatë sezonit veror.