Raporti i Bankës Botërore: Mbi 40% e qytetarëve të Shqipërisë jetojnë jashtë vendit

Një raport i ri i Bankës Botërore ka ngritur alarmin për ritmin e lartë të emigrimit nga Shqipëria, Bosnja-Hercegovina dhe Moldavia. Sipas të dhënave, më shumë se 40% e qytetarëve të lindur në këto vende jetojnë sot jashtë atdheut – një prej përqindjeve më të larta në botë.

Ky largim masiv përfshin kryesisht njerëz në moshë pune, shpesh me aftësi të larta profesionale, duke krijuar boshllëqe serioze në tregun lokal të punës. Sektorë si turizmi, ndërtimi dhe shërbimet po përballen me mungesa të mëdha të punonjësve, ndërsa shumë biznese po e kanë të vështirë të realizojnë planet e tyre afatgjata.

Ekspertët paralajmërojnë se kjo valë emigrimi po lë pasoja të dukshme edhe te të rinjtë që mbeten pas, të cilët hasin vështirësi për të gjetur punë dhe për të ndërtuar përvojë profesionale. Në thelb, raporti tregon një realitet të hidhur: kapitali njerëzor po largohet më shpejt sesa po krijohen mundësitë brenda vendit.