Dashmir Ristemi sjell një histori shqiptare në ekranin e madh zviceran

Kur filmi zviceran “Von dem, was bleibt” të nisë shfaqjen në kinematë e Zvicrës më 18 qershor, një nga fytyrat kryesore të tij do të jetë aktori me prejardhje shqiptare, Dashmir Ristemi.

Në filmin e ri të regjisores Lisa Blatter, Ristemi interpreton rolin e Norit, një burrë që pret të bëhet baba për herë të parë. Por jeta e personazhit të tij ndryshon papritur pas një nate misterioze, kur zgjohet i lënduar dhe pa asnjë kujtim për atë që ka ndodhur. Përballë pasigurive dhe humbjeve, ai dhe partnerja e tij Selma detyrohen të përballen me sfida të mëdha emocionale.

Për komunitetin shqiptar në Zvicër, ky projekt ka një domethënie të veçantë. Jo vetëm që roli kryesor mashkullor i është besuar Dashmir Ristemit, por edhe familja e personazhit që ai interpreton në film është shqiptare. Kjo sjell në ekran elemente të identitetit dhe kulturës shqiptare brenda një produksioni të rëndësishëm të kinematografisë zvicerane.

Filmi është prezantuar tashmë në festivale ndërkombëtare dhe tani po përgatitet për publikun e gjerë në kinematë zvicerane. Premierat me praninë e ekipit realizues dhe aktorëve do të zhvillohen në Aarau, Cyrih dhe Bernë gjatë javës së ardhshme.

Për Dashmir Ristemin, ky është një tjetër hap i rëndësishëm në karrierën artistike. Ndërsa për publikun shqiptar në Zvicër, është një mundësi për të parë një aktor me rrënjë shqiptare në qendër të një historie që prek tema universale, por që ruan edhe një lidhje të veçantë me identitetin e komunitetit tonë.