Në një vend ku arti i picës është pjesë e kulturës së përditshme, një i ri me origjinë shqiptare ka arritur të tërheqë vëmendjen me talentin dhe përkushtimin e tij.

Emanuele Muhaxhiri, 24 vjeç, i lindur në Velletri pranë Romës nga prindër shqiptarë, është shpallur fitues i konkursit italian “Pizza: Generazione Futuro” (Pica: Gjenerata e së Ardhmes), një garë që promovon talentet e reja të botës së picës në Itali.

Fitorja e tij erdhi në finalen e zhvilluar në provincën e Kazertës, ku juria vlerësoi krijimin e tij “Super Marinara”. E frymëzuar nga tradita romane, pica kombinon përbërës të thjeshtë si domatet, hudhrat dhe kaperët, por pikërisht balanca mes tyre e bëri atë të dallohej nga konkurrenca.

Pas shpalljes së fituesit, Muhaxhiri tregoi se frymëzimin më të madh e ka marrë nga familja e tij. Sipas tij, pasioni i trashëguar nga prindërit shqiptarë ka qenë elementi që e ka shoqëruar gjatë gjithë rrugës së tij profesionale.

Sot, ai menaxhon së bashku me vëllain e tij një piceri në Velletri, ku çdo ditë vazhdon të eksperimentojë me shije dhe ide të reja. Për të, “Super Marinara” ishte përpjekja për ta kthyer një recetë tradicionale në një krijim me identitet të veçantë.

Suksesi i tij nuk përfundon me këtë konkurs. Në korrik, në Milano, Emanuele Muhaxhiri do të nderohet edhe me çmimin “Giovane dell’Anno 2026” (I Riu i Vitit 2026), një vlerësim që ndahet nga guida prestigjioze italiane “50 Top Pizza Italia”, një prej referencave më të rëndësishme të sektorit në Itali.

Historia e Emanuele Muhaxhirit është një tjetër dëshmi e pranisë së shqiptarëve në fusha të ndryshme të jetës profesionale në Evropë. Nga një piceri familjare në Velletri deri te një nga vlerësimet më të rëndësishme për talentet e reja të picës në Itali, ai po ndërton emrin e tij në një profesion ku konkurrenca është e madhe dhe standardet janë ndër më të lartat.