QMK sjell aplikacionin “Where Are You?” për rastet emergjente

Qendra për Menaxhimin e Krizave (QMK) ka bërë të ditur se së shpejti do të lansojë aplikacionin “Where Are You?”, një zgjidhje e re që synon ta bëjë më të shpejtë dhe më efikas komunikimin e qytetarëve me numrin emergjent 112.

Përmes aplikacionit, përdoruesit do të kenë mundësi të dërgojnë vendndodhjen e tyre të saktë, fotografi dhe video nga vendi i ngjarjes. Sistemi do të mbështesë edhe komunikimin e drejtpërdrejtë me video me Qendrën Operative, duke ndihmuar shërbimet emergjente të krijojnë një pasqyrë më të qartë të situatës.

Një nga risitë më të rëndësishme është funksioni "Silent Call", i cili u mundëson viktimave të dhunës në familje dhe personave që ndodhen në rrezik të kërkojnë ndihmë pa folur, në mënyrë të sigurt dhe diskrete.

Sipas drejtorit të QMK-së, Muhamet Ali, këto funksione janë pjesë e modernizimit të sistemit 112, me synimin për të përmirësuar sigurinë e qytetarëve, për të siguruar informacione më të sakta për ekipet emergjente dhe për të mundësuar reagim më të shpejtë në raste kritike.