Prishtinë: Hapet programi falas i mësimit të notit për nxënësit e shkollave publike

Nxënësit e shkollave publike në Prishtinë këtë verë do të kenë mundësinë të ndjekin falas mësimet e notit, falë programit të organizuar nga Drejtoria e Arsimit e Kryeqytetit.

Programi është i dedikuar për fëmijët e moshës 9 deri në 11 vjeç dhe do të zhvillohet në Pishinën e Gërmisë nga 20 korriku deri më 21 gusht 2026.

Interesimi për këtë nismë ka qenë i jashtëzakonshëm. Në më pak se 24 orë nga hapja e aplikimeve janë regjistruar mbi 500 aplikime, ndërsa programi është planifikuar të përfshijë gjithsej 700 nxënës.

Ky interesim i madh tregon rëndësinë që prindërit i kushtojnë mësimit të notit si një aftësi jetike, por edhe vlerën e programeve që u ofrojnë fëmijëve mundësi për të mësuar, për t'u zhvilluar dhe për të kaluar pushimet verore në një mjedis të sigurt dhe profesional.