Gjermania korrigjon gabimin për Aeroportin e Prishtinës

Një pasaktësi që kishte mbetur për vite me radhë në të dhënat e Autoritetit Federal të Aviacionit Civil të Gjermanisë është korrigjuar. Aeroporti Ndërkombëtar i Prishtinës “Adem Jashari” nuk figuron më gabimisht si pjesë e Serbisë.

Lajmin e bëri të ditur ambasadori i Kosovës në Gjermani, Faruk Ajeti, i cili tha se korrigjimi u arrit falë reagimit të qytetarëve dhe angazhimit të vazhdueshëm diplomatik. Sipas tij, ky rast dëshmon se bashkëpunimi mes institucioneve dhe qytetarëve mund të sjellë rezultate konkrete.

Ambasada e Kosovës në Gjermani u ka bërë thirrje qytetarëve që të raportojnë çdo rast kur institucionet apo kompanitë gjermane paraqesin gabimisht Republikën e Kosovës ose qytetet e saj. Sipas Ambasadës, çdo raportim i shoqëruar me dëshmi ndihmon në verifikimin dhe korrigjimin e pasaktësive, ndërsa angazhimi për raste të tilla do të vazhdojë edhe në të ardhmen.