Premiera e “NËNA” vjen në Gjilan, interesimi mbush sallën para ngritjes së perdes

Një grua përballë vetmisë, humbjes dhe frikës nga braktisja. Kjo është bota e “NËNA”, shfaqjes së re që ngjitet në skenën e Teatrit të Gjilanit të enjten, më 25 qershor, në ora 20:00. Me tekst nga dramaturgu francez Florian Zeller dhe regji të Erson Zymberit, publiku ftohet në një rrugëtim emocional që lëviz mes realitetit, kujtimeve dhe pasigurive të mendjes njerëzore.

Historia ndjek një grua që përpiqet të gjejë vendin e saj në një botë që po ndryshon vazhdimisht rreth saj. Në qendër janë dashuria, mungesa, ankthi dhe pyetjet që lindin kur lidhjet më të afërta fillojnë të transformohen. Në role interpretojnë Aurita Agushi, Ernest Zymberi, Gani Rrahmani dhe Tringa Hasani.

Interesimi për premierën ka qenë i madh, aq sa të gjitha vendet janë rezervuar para natës së shfaqjes. Në realizimin e saj kanë kontribuar skenografi Bekim Korça, koreografi Gjergj Prevazi, kompozitori Tomor Kuçi, video artisti dhe dizajneri i ndriçimit Burim Baftiu, kostumografja Leudita Hyseni, ndërsa përkthimi është bërë nga Shkelzen Berisha.