BE hap rrugën për euron digjitale, synon të ulë varësinë nga Visa dhe Mastercard

Bashkimi Europian ka bërë një hap të rëndësishëm drejt një sistemi të ri financiar. Komisioni për Çështjet Ekonomike dhe Monetare në Parlamentin Europian ka miratuar projektin për euron digjitale, duke hapur rrugën për një ndryshim të madh në mënyrën si kryhen pagesat në eurozonë.

Ideja është e qartë: të krijohet një formë elektronike e parasë së bankës qendrore, e emetuar nga Banka Qendrore Europiane, që mund të përdoret për pagesa online dhe offline përmes një portofoli digjital. Projekti synon të forcojë pavarësinë financiare të BE-së, në një kohë kur shumica e transaksioneve me kartë në Evropë kontrollohen nga Visa dhe Mastercard.

Sipas të dhënave të BQE-së, këto dy kompani amerikane përpunojnë mbi gjysmën e pagesave me kartë në eurozonë, sidomos në transaksionet ndërkufitare. Me euron digjitale, BE synon të krijojë një alternativë të brendshme, duke ruajtur njëkohësisht privatësinë e përdoruesve dhe duke mos zëvendësuar paranë fizike apo bankat tradicionale.

Projekti pritet të kalojë në negociata mes shteteve anëtare dhe të hyjë në fazën e zbatimit deri në vitin 2029. Për autoritetet europiane, ky nuk është vetëm një inovacion teknologjik, por një hap strategjik drejt forcimit të sovranitetit financiar të BE-së.