“Odisea” thyen rekord në Kosovë, 1.333 bileta të shitura në Cineplexx

Një nga veçoritë që e bën këtë produksion të veçantë është fakti se "Odisea" është filmi i parë artistik në histori i xhiruar tërësisht me kamera IMAX. Kjo teknologji ofron ekran shumë më të madh, rezolucion më të lartë, më shumë detaje në figurë dhe një cilësi superiore të zërit, duke krijuar një përvojë shumë më gjithëpërfshirëse për shikuesin. Vetë Nolan ka theksuar se filmi është konceptuar për t'u parë pikërisht në formatin IMAX.

Edhe në shkallë globale, filmi po vendos rekorde. Sipas IMAX Corporation, "Odisea" realizoi debutimin më të madh në historinë e kompanisë në tregjet ndërkombëtare krahasuese, debutimin më të mirë ndonjëherë për një film të Christopher Nolan dhe për një produksion të Universal Pictures. Vetëm gjatë fundjavës së parë, filmi arkëtoi 52 milionë dollarë në ekranet IMAX në mbarë botën, ndërsa para-shitjet globale të biletave arritën një rekord prej 50 milionë dollarësh. Në total, filmi debutoi me 264 milionë dollarë në arkën botërore, duke u kthyer menjëherë në një nga sukseset më të mëdha të vitit.

Rekordi prej 1.333 biletash në Cineplexx Kosovo tregon se entuziazmi për këtë superproduksion nuk është vetëm fenomen botëror. Edhe publiku kosovar i është bashkuar valës së interesimit, duke e bërë "Odisean" një nga premierat më të suksesshme që ka përjetuar ndonjëherë kinemaja në vend.