“Antigona” triumfon në festivalin ndërkombëtar të filmit

Një tjetër lajm i mirë vjen për filmin shqiptar. “Antigona”, me regji të Ibër Dearit, është shpallur fitues i çmimit “Filmi më i Mirë i Shkurtër” në edicionin e pestë të Festivalit Ballkanik dhe Mesdhetar të Filmit “Across the Lake”, një ngjarje që bashkon krijues nga vendet e Ballkanit dhe Mesdheut dhe synon të promovojë autorët e rinj, dialogun kulturor dhe kinemanë e rajonit.

Filmi u vlerësua mes një konkurrencë prej 16 produksionesh, ku morën pjesë 10 filma vendas dhe 6 ndërkombëtarë, duke përfshirë filma artistikë dhe dokumentarë. Juria e festivalit e shpalli “Antigonën” fituese të çmimit kryesor në kategorinë e filmit të shkurtër, një vlerësim që konfirmon jehonën në rritje të krijimtarisë shqiptare në skenën rajonale.

“Antigona” është një film i shkurtër në gjuhën shqipe që ndjek historinë e një gruaje nga një zonë rurale e Maqedonisë së Veriut. Pas vdekjes së të atit, ajo merr përsipër punën e tij si drejtuese e një furgoni që lidh fshatrat e izoluar. Në një mjedis të dominuar nga paragjykimet ndaj grave, ajo sfidon stereotipet dhe, përmes vendosmërisë së saj, sjell ndryshime në mënyrën se si komuniteti e sheh rolin e gruas. Filmi është bashkëregji e Ibër Dearit dhe Mirsad Abazit dhe pati premierën botërore këtë vit në Sheffield DocFest, një nga festivalet më të njohura të filmit dokumentar në botë.