Mbi 80% e shqiptarëve do të luftonin për të mbrojtur vendin

Shqipëria renditet ndër vendet me nivelin më të lartë të gatishmërisë qytetare për të mbrojtur vendin në rast të një agresioni ushtarak. Këtë e tregon një sondazh i realizuar në të gjitha shtetet anëtare të NATO-s, ku 86 për qind e qytetarëve shqiptarë deklaruan se do të merrnin pjesë ose me siguri do të merrnin pjesë në rezistencën e armatosur nëse vendi i tyre do të sulmohej.

Sipas rezultateve të studimit, Shqipëria zë vendin e tretë mes 32 vendeve të NATO-s. Në krye të renditjes janë Finlanda dhe Polonia, të dyja me nga 87 për qind, ndërsa Shqipëria ndan praktikisht të njëjtin nivel mbështetjeje me Kanadanë, e cila gjithashtu regjistron 86 për qind.

Pas tyre renditen Greqia me 85 për qind, Turqia me 84 për qind, Norvegjia me 83 për qind, ndërsa Kroacia dhe Shtetet e Bashkuara kanë nga 82 për qind. Mbretëria e Bashkuar regjistron 81 për qind.

Në anën tjetër të listës ndodhen Italia me 59 për qind, Hungaria me 58 për qind dhe Islanda me 39 për qind, që është niveli më i ulët i gatishmërisë për rezistencë të armatosur mes vendeve të përfshira në studim.