Dua Lipa hap Bibliotekën "Manifesto" në Portugali

Nga skenat më të mëdha të muzikës botërore, drejt një misioni për librin dhe lirinë e fjalës. Dua Lipa po lë gjurmë edhe jashtë industrisë së muzikës.

Dua Lipa, ka inauguruar "Bibliotekën Manifesto", një hapësirë të veçantë kushtuar librave që janë ndaluar ose censuruar në vende të ndryshme të botës. Biblioteka do të jetë pjesë e përhershme e Livraria Lello, një prej librarive më të njohura historike në Porto të Portugalisë.

Projekti u prezantua gjatë festivalit ndërkombëtar të librit BABELL – City of Books dhe, sipas artistes, është rezultat i një angazhimi disavjeçar për të promovuar leximin, mendimin kritik dhe lirinë e shprehjes. Për Dua Lipën, librat duhet të jenë të qasshëm për të gjithë, pa kufizime apo censurë.

Biblioteka përmban rreth 100 libra, të organizuar në katër tema kryesore: pushteti, kontrolli, zëri dhe kujtesa. Mes tyre gjenden vepra të autorëve të njohur ndërkombëtarë si Margaret Atwood, Salman Rushdie, Olga Tokarczuk dhe Reginald Dwayne Betts, autorë që në periudha të ndryshme janë përballur me censurë ose ndalim të veprave të tyre.

Ky projekt lidhet natyrshëm me angazhimin e vazhdueshëm të artistes për promovimin e leximit përmes Service95 Book Club, klubit të saj ndërkombëtar të librit. Ndërkohë, në vitin 2026, Dua Lipa do të marrë edhe rolin e kuratores së Festivalit të Letërsisë në Londër, që do të mbahet në Southbank Centre, duke e zgjeruar edhe më tej kontributin e saj në botën e kulturës dhe letërsisë.