Luajtja e një instrumenti muzikor mbron trurin nga plakja

Një studim i ri i kryer nga shkencëtarët në Kanada dhe Kinë tregon se të mësuarit dhe praktikimi i një instrumenti muzikor mund të mbrojë trurin nga plakja dhe rënia e aftësive njohëse.

Të rriturit më të moshuar që kishin vite të tëra përvojë muzikore rezultuan më të aftë për të kuptuar të folurën në mjedise me zhurmë, krahasuar me ata që nuk kishin luajtur kurrë një instrument muzikor. Truri i tyre punonte në mënyrë më efikase, ngjashëm me atë të të rinjve, duke shpenzuar më pak energji për t’u fokusuar.

Praktikimi i muzikës ndërton atë që studiuesit e quajnë “rezervë njohëse”, një mekanizëm mbrojtës që e ndihmon trurin të funksionojë më mirë edhe me kalimin e viteve. Trajnimi muzikor forcon lidhjet mes zonave të trurit që lidhen me dëgjimin, lëvizjen dhe të folurën, duke e bërë më të lehtë përpunimin e tingujve në situata të vështira, si për shembull dallimi i një zëri në mes të një turmë.

Studimi i publikuar në PLOS Biology përfshiu 25 muzikantë të moshuar me një mesatare moshe 65 vjeç dhe mbi 30 vite përvojë, 25 të moshuar pa eksperiencë muzikore dhe dy grupe të rinjsh në të 20-at.

Pjesëmarrësit dëgjuan tinguj të ndryshëm të shoqëruar me nivele të ndryshme zhurme, ndërsa aktiviteti i trurit u monitorua me fMRI. Rezultatet treguan se muzikantët e moshuar dalluan më mirë tingujt krahasuar me bashkëmoshatarët e tyre, edhe pse jo aq mirë sa të rinjtë.

Ekspertët theksojnë se këto ndryshime nuk lidhen me sëmundje si Alzheimer, por me plakjen normale. Ndërkohë, një studim tjetër nga Universiteti i Kiotos tregoi se edhe personat që fillojnë të mësojnë muzikë në të 70-at mund të përfitojnë: pas katër vitesh praktikë, ata performuan më mirë në testet e memories verbale.

Sipas studiuesve, rreth 12 orë praktikë javore janë të mjaftueshme për të ndërtuar këtë “rezervë njohëse”. Kjo hap rrugën për terapi të reja parandaluese kundër demencës, duke e bërë muzikën jo vetëm një art, por edhe një mjet të fuqishëm për shëndetin e trurit.