Kosovë – Slloveni: Gjithçka gati për mbrëmjen e madhe në “Fadil Vokrri”

Atmosferë elektrizuese pritet sonte në stadiumin “Fadil Vokrri”, ku Kombëtarja e Kosovës do të përballet me Slloveninë në një ndeshje tejet të rëndësishme në kuadër të kualifikimeve për Kupën e Botës 2026.

Dardanët, të udhëhequr nga trajneri Franco Foda, do të kërkojnë me çdo kusht fitoren për të mbajtur gjallë shpresat e tyre në grup. Përballë do të kenë një kundërshtar të disiplinuar dhe fizikisht të fortë, teksa Sllovenia vjen në Prishtinë me objektivin e qartë për të ruajtur pozitat e saj në renditje.

Franco Foda: “Besoj në skuadrën time – përpara tifozëve tanë do të japim maksimumin”

Në konferencën e fundit për media, përzgjedhësi i Kosovës u shpreh i qetë, por i vendosur për rezultat pozitiv.

“Sllovenia është një skuadër me mbrojtje shumë të mirë, ndaj për ne është e rëndësishme të jemi të kujdesshëm prapa dhe të shfrytëzojmë rastet përpara për të shënuar gola. Atmosfera është shumë e mirë. Të gjithë lojtarët janë në formë të mirë. Jam i bindur që në fushën tonë dhe para tifozëve tanë do të bëjmë një paraqitje të shkëlqyer.”, deklaroi Foda.

Matjaz Kek: “Kosova ka motiv të madh – duhet të jemi të kujdesshëm

Nga ana tjetër, trajneri i Sllovenisë, Matjaz Kek, ka pranuar se pret një ndeshje të fortë dhe me shumë duele.

“Kjo do të jetë një sfidë me shumë duele dhe agresivitet. E dimë që Kosova ka nevojë për pikë dhe do të luajë me motiv të madh. Ne duhet të jemi të përqendruar maksimalisht, përndryshe ndëshkimi vjen shpejt,” u shpreh Kek.

Prishtina në ethe futbolli

Qyteti është veshur me ngjyrat blu dhe të verdhë, ndërsa pritet që stadiumi të jetë i mbushur plot, me mijëra tifozë që do të krijojnë atmosferën unike që vetëm “Dardanët” dinë ta sjellin.

Kombëtarja e Kosovës do të kërkojë të rikthejë emocionin e fitoreve në shtëpi, me lojtarë si Muriqi, Rashica, Rrahmani e Zhegrova që pritet të jenë në qendër të vëmendjes.

Sfida Kosovë – Slloveni fillon në orën 20:45, dhe do të transmetohet drejtpërdrejt për të gjithë adhuruesit e futbollit.

Mbrëmja e sotme pritet të jetë më shumë se një ndeshje – është një provë karakteri, pasioni dhe besimi për djemtë e Kosovës, që synojnë të mbajnë gjallë ëndrrën drejt Botërorit 2026.

#ForcaDardanët 💙💛