Korrieri i ushqimeve vlerësohet me çmimin më prestigjioz letrar në Kinë

Një histori e pazakontë vjen nga Kina, ku një korrier ushqimesh ka fituar një nga çmimet më prestigjioze të letërsisë në vend. Wang Jibing, 56 vjeç, është shpallur fitues i Çmimit Letrar “Lu Xun” për librin e tij me poezi “Low Flight” (Fluturim i ulët), i frymëzuar nga përditshmëria dhe sfidat e korrierëve që shpërndajnë ushqime.

Wang nisi punën si korrier rreth vitit 2019, pasi për dekada kishte ushtruar profesione të ndryshme për të siguruar jetesën. Ai kishte punuar në ndërtimtari, kishte mbledhur materiale për riciklim dhe kishte shitur produkte në rrugë, por pasioni për librat dhe shkrimin nuk iu shua asnjëherë.

Poezitë dhe esetë e tij filluan të tërhiqnin vëmendje në rrjetet sociale, ndërsa në vitin 2022 u bë i njohur me poezinë “Njeriu me nxitim”, e frymëzuar nga një dërgesë e vështirë që i kishte shkaktuar orë të tëra vonesash për shkak të një adrese të pasaktë.

Pas librit të tij të parë në vitin 2023, Wang publikoi një vit më vonë “Low Flight”, një përmbledhje e ndërtuar edhe mbi biseda me rreth 200 korrierë të tjerë. Në vargjet e tij ai përcjell idenë se edhe njerëzit me profesione të zakonshme kanë histori, ëndrra dhe përvoja që meritojnë të dëgjohen.