Iso-polifonia shqiptare pjesë e “Odiseas” së Christopher Nolan

Kompozitori fitues i Oscarit, Ludwig Göransson, zbulon se për kolonën zanore të filmit “The Odyssey” është frymëzuar nga iso-polifonia shqiptare dhe tingujt autentikë të barinjve të Jugut. Një traditë shekullore shqiptare do të dëgjohet në një nga prodhimet më të mëdha të Hollywood-it.

Një nga pasuritë më të çmuara të kulturës shqiptare do të ketë jehonë në ekranet e kinemave në mbarë botën. Kompozitori suedez Ludwig Göransson, fitues i çmimit Oscar dhe autor i muzikës së filmit të ri “The Odyssey” të regjisorit Christopher Nolan, ka zbuluar se një pjesë e kolonës zanore është frymëzuar nga iso-polifonia shqiptare.

Në kërkim të një identiteti muzikor që t'i përshtatej botës së lashtë të poemës së Homerit, Göransson udhëtoi në jug të Shqipërisë. Atje ai kaloi një javë duke regjistruar këngë iso-polifonike, një traditë shumëzërëshe që është pjesë e trashëgimisë kulturore shqiptare dhe që prej vitit 2005 është e përfshirë në Listën Përfaqësuese të Trashëgimisë Kulturore Jomateriale të UNESCO-s.

Përveç këngëve, kompozitori regjistroi edhe tingujt e fyellit të barinjve shqiptarë, një instrument që vazhdon të shoqërojë jetën tradicionale në zonat malore të Jugut. Për të ruajtur autenticitetin e momentit, ekipi i filmit nisi punën që në orët e para të mëngjesit.