Fluturimi më i gjatë në botë testohet më 24 korrik

Airbus do të provojë më 24 korrik një fluturim rekord prej rreth 22 orësh, një hap i rëndësishëm drejt fluturimeve direkte mes Australisë, Evropës dhe Amerikës së Veriut.

Të udhëtosh nga Australia në Evropë ose në Shtetet e Bashkuara pa asnjë ndalesë mund të bëhet realitet brenda pak vitesh. Më 24 korrik, Airbus do të zhvillojë një test të rëndësishëm me modelin Airbus A350-1000 ULR (Ultra Long Range), i cili do të fluturojë pa ndërprerje nga Toulouse i Francës drejt Melburnit të Australisë.

Fluturimi pritet të zgjasë rreth 22 orë dhe do të përshkojë afro 17 mijë kilometra. Ai është pjesë e Project Sunrise, një iniciativë e kompanisë ajrore australiane Qantas, që synon të mundësojë fluturime direkte nga Sydney drejt Londrës dhe Nju Jorkut pa ndalesa. Nëse testet dhe certifikimet përfundojnë me sukses, këto linja pritet të nisin në vitin 2027.

Avioni i përdorur për testin është pajisur me një rezervuar shtesë karburanti, sisteme të përmirësuara dhe teknologji që i mundësojnë të fluturojë deri në rreth 18 mijë kilometra. Përpara se të hyjë në shërbim, ai duhet të marrë miratimin e Agjencisë Evropiane për Sigurinë e Aviacionit (EASA).