Disa media publike të Hungarisë ndalin lajmet dhe kërkojnë falje

Një zhvillim i pazakontë ka tërhequr vëmendjen në Hungari. Disa nga mediat kryesore publike të vendit ndërprenë transmetimet informative dhe shfaqën një mesazh të rrallë publik, duke kërkuar falje për mënyrën se si kishin informuar qytetarët gjatë viteve të fundit.

Më i dukshmi ishte televizioni publik M1, ku në vend të edicionit të lajmeve u shfaq një ekran i zi me mesazhin: "Media publike nuk mund të gënjejë. Kërkojmë falje që e kemi bërë këtë për shumë vite." I njëjti veprim u ndërmor edhe nga Kossuth Radio, radioja kryesore publike e vendit, ndërsa edhe faqet zyrtare të këtyre institucioneve kaluan përkohësisht në ekran të zi. Sipas autoriteteve të reja, transmetimet informative janë pezulluar vetëm përkohësisht, ndërsa në radio po transmetohen programe muzikore.

Ky vendim vjen pas fitores në zgjedhjet parlamentare të partisë Tisza, të udhëhequr nga kryeministri i ri Péter Magyar. Një nga premtimet kryesore të tij ishte reformimi i mediave publike dhe rikthimi i pavarësisë editoriale, pas viteve të kritikave se ato kishin humbur rolin e tyre si media në shërbim të publikut.

Gjatë 16 viteve të qeverisjes së Viktor Orbánit, organizata ndërkombëtare për lirinë e medias dhe opozita kanë akuzuar vazhdimisht mediat publike se favorizonin qeverinë dhe nuk ofronin raportim të balancuar. Për këtë arsye, reforma e nisur nga qeveria e re po shihet si një nga ndryshimet më të rëndësishme në sistemin mediatik hungarez.