Zvicra nuk është më vendi më i shtrenjtë në Evropë, por mbetet ndër më të kushtueshmit

Për vite me radhë, kur flitej për çmime të larta në Evropë, emri i parë që vinte në mendje ishte Zvicra. Por një renditje e re ka ndryshuar vendet në krye të listës. Tani titulli i vendit më të shtrenjtë në Evropë i takon Islandës.

Sipas indeksit të ri të Eurostat, i cili analizon çmimet e më shumë se 2 mijë produkteve dhe shërbimeve, Islanda ka arritur një nivel çmimesh prej 183.7 pikësh krahasuar me mesataren e Bashkimit Evropian prej 100. Zvicra renditet menjëherë pas saj me 181 pikë, duke qenë rreth 81 për qind më e shtrenjtë se mesatarja evropiane.

Por çmimet nuk tregojnë gjithçka. Një vend mund të jetë i shtrenjtë, por banorët e tij mund të kenë edhe të ardhura më të larta. Pikërisht këtu Zvicra vazhdon të ketë një avantazh të madh. Analiza të ndryshme tregojnë se fuqia blerëse e qytetarëve zviceranë mbetet ndër më të lartat në Evropë.

Sipas studimeve të fundit, fuqia blerëse mesatare për person në Zvicër arrin rreth 49 mijë franga, shumë më tepër se në vendet fqinje si Gjermania dhe Austria. Diferencat janë të dukshme edhe brenda vetë Zvicrës, ku kantonet si Zug, Schwyz dhe Nidwalden kanë fuqinë më të madhe shpenzuese, ndërsa Ticino, Valais dhe Jura renditen më poshtë.