Alban Hyseni viziton Ceni Company në Gjilan: Diskutohet për zhvillimin e biznesit dhe të qytetit
Sot, kryetari i Komunës së Gjilanit dhe kandidati i Lëvizjes VETËVENDOSJE, Alban Hyseni, zhvilloi një vizitë në Ceni Company, një nga kompanitë më të suksesshme ndërtimore në qytet.
Gjatë takimit, Hyseni u njoh nga afër me aktivitetet dhe projektet aktuale të kompanisë, duke diskutuar sfidat me të cilat përballen bizneset lokale dhe mundësitë për të bashkëpunuar në zhvillimin e mëtejshëm të qytetit. Ai theksoi rëndësinë e një dialogu të hapur mes pushtetit lokal dhe sipërmarrësve, si dhe idetë e reja për projekte që mund ta forcojnë ekonominë dhe infrastrukturën e Gjilanit.
“Gjilani ka potencial të madh. BASHKË me njerëzit e punës dhe të vullnetit, do të vazhdojmë ta bëjmë qytetin tonë më të mirë për të gjithë,” theksoi Hyseni.
Ceni Company është një nga kompanitë më të suksesshme ndërtimore në Gjilan, e njohur për standardet e larta të cilësisë dhe përkushtimin ndaj projekteve të mëdha. Një nga arritjet e saj më të dukshme është kompleksi i banimit dhe biznesit me 11 godina në lagjen Fidanishta në Gjilan, që ofron hapësira moderne për banim dhe aktivitet biznesor, duke kontribuar në zhvillimin urban dhe cilësinë e jetës për qytetarët.
