Gjashtë autorë nga Kosova prezantojnë letërsinë shqiptare në Panairin e Librit në Leipzig 2026
Letërsia nga Kosova do të jetë pjesë e një prej ngjarjeve më të mëdha të botës së librit. Në edicionin e vitit 2026 të Leipzig Book Fair, Kosova do të prezantohet me një delegacion prej gjashtë autorësh, të përzgjedhur nga Biblioteka Kombëtare e Kosovës, duke sjellë në skenën ndërkombëtare zëra të rëndësishëm të letërsisë bashkëkohore shqiptare.
Panairi i Librit në Leipzig konsiderohet një nga ngjarjet më të mëdha letrare në Evropë, i njohur për fokusin e tij te autorët, dialogu kulturor dhe takimet direkte mes shkrimtarëve dhe lexuesve. Çdo vit ai mbledh mijëra botues, përkthyes, studiues dhe dashamirë të librit nga e gjithë bota, duke u shndërruar në një platformë të rëndësishme për prezantimin e letërsive nga vende dhe kultura të ndryshme.
Në këtë edicion, Kosova do të përfaqësohet nga gjashtë autorë që përfaqësojnë stile dhe tema të ndryshme të krijimtarisë letrare:
- Majlinda Bregasi – me librin “Gërsheti i Prerë”
- Jehona Kicaj – me librin “Ë”
- Arbër Selmani – me librin “Testosteron”
- Nerimane Kamberi – shkrimtare, përkthyese dhe profesoreshë e letërsisë frënge
- Meliza Krasniqi – me librin studimor “Albanian Women Writers 1954–1990”
- Eli Krasniqi – me librin “Në të tjera shpi”
Përveç prezantimit të librave, autorët nga Kosova do të marrin pjesë edhe në diskutime dhe panele letrare që trajtojnë temat e identitetit, historisë dhe rolit të letërsisë në shoqëri.
Një nga panelet kryesore titullohet “Kujtesë e kontestuar, zëra të lidhur: Letërsia dhe politika në Ballkan”, ku do të diskutojnë Jehona Kicaj, Majlinda Bregasi dhe Nerimane Kamberi. Paneli do të mbahet më 19 mars 2026, nga ora 10:30 deri në 11:30, në hapësirën Translate Forum / Salon International (Hall 4).
Ndërkohë, më 20 mars 2026, autorët Arbër Selmani, Meliza Krasniqi dhe Eli Krasniqi do të jenë pjesë e panelit “Gjuhë të vogla, histori të mëdha: Letërsia shqipe në kontekst global”, i cili do të zhvillohet në Global Perspectives Forum (Hall 4).
Pjesëmarrja në këtë panair është një hap i rëndësishëm për promovimin e letërsisë shqiptare jashtë vendit. Përmes takimeve me botues, përkthyes dhe lexues ndërkombëtarë, autorët nga Kosova kanë mundësinë të prezantojnë historitë, përvojat dhe identitetin kulturor të vendit në një skenë globale.
Në këtë mënyrë, prania e Kosovës në Panairin e Librit në Leipzig jo vetëm që promovon librin dhe autorët shqiptarë, por edhe e vendos letërsinë kosovare në një dialog më të gjerë kulturor me Evropën dhe botën.
