UKZ dhe Instituti “Ali Hadri” bashkë për konferencën mbi “Flakën e Janarit”

Universiteti Publik “Kadri Zeka” në Gjilan dhe Instituti i Historisë “Ali Hadri” në Prishtinë po koordinohen për organizimin e Konferencës Shkencore “Flaka e Janarit: sakrifica, rezistenca dhe kujtesa kombëtare (1980–1999)”.

Një delegacion i Institutit të Historisë, i udhëhequr nga drejtoresha Prof. Dr. Teuta Shala Peli, së bashku me Prof. Dr. Fatmir Arifi dhe znj. Ardiana Bajrami, ka zhvilluar një vizitë zyrtare në Universitetin Publik “Kadri Zeka”. Ata u pritën nga Rektori Prof. Asoc. Dr. Artan Dërmaku, i cili shprehu gatishmërinë për mbështetjen e plotë të konferencës.

Në vijim, në Fakultetin e Shkencave Sociale u mbajt një takim pune mes përfaqësuesve të institutit dhe stafit akademik të universitetit. U diskutuan temat kryesore, kriteret organizative dhe drejtimet shkencore të konferencës, me fokus në trajtimin e periudhës historike 1980–1999.

Konferenca do të organizohet në bashkëpunim me Komunën e Gjilanit dhe pritet të mbledhë studiues dhe ekspertë nga të gjitha trevat shqiptare, me synim dokumentimin dhe analizimin e kujtesës historike kombëtare.