Sunny Hill Festival fiton Çmimin për Impakt Ekonomik 2025 nga Oda Ekonomike e Kosovës

Festivali Sunny Hill, një prej ngjarjeve më të mëdha dhe më të njohura muzikore në rajon, ka fituar Çmimin për Impakt Ekonomik 2025, në kuadër të gala-mbrëmjes “THE BEST OF KOSOVA 2025”, organizuar nga Oda Ekonomike e Kosovës. Ky vlerësim njihet për rëndësinë e tij në njohjen e iniciativave që ndikojnë pozitivisht në zhvillimin ekonomik dhe promovimin e imazhit të Kosovës në nivel ndërkombëtar.

Organizatorët e festivalit janë vlerësuar për mënyrën se si Sunny Hill ka kombinuar muzikën, kulturën dhe kreativitetin, duke krijuar një platformë ku talentet e reja shfaqen dhe lidhjet e Kosovës me industrinë globale muzikore forcohen. Përveç dimensionit artistik, festivali ka kontribuar në mënyrë të drejtpërdrejtë në ekonominë lokale, duke gjeneruar përfitime për sektorë të ndryshëm si turizmi, hoteleria, gastronomia, transporti dhe shërbimet mbështetëse. Sipas vlerësimeve, impakti ekonomik i festivalit arrin rreth 22 milionë euro, ndërsa ekspozimi në media kap qindra miliona euro, me mbi 150 media të akredituara nga e gjithë bota.

Edicioni i këtij viti ka tërhequr mbi 100 mijë vizitorë nga rreth 60 vende, duke mbushur hotelet në Prishtinë dhe qytetet përreth pothuajse në kapacitet të plotë. Për herë të parë, organizatorët prezantuan platformën “Sunny Hill Travel”, e cila ofron paketa të plota për akomodim, bileta dhe transport, duke e bërë përvojën e festivalit edhe më të lehtë dhe të këndshme për vizitorët.

Oda Ekonomike e Kosovës theksoi se Sunny Hill është shembull i suksesshëm i mënyrës se si ngjarjet kulturore dhe muzikore mund të shndërrohen në motorë të zhvillimit ekonomik dhe diplomacisë kulturore.

Edicioni i këtij viti solli në skenë artistë të njohur globalë si Dua Lipa, me turneun e saj “Radical Optimism”; Shawn Mendes me “On The Road Again”; Peggy Gou, një emër i rëndësishëm në muzikën elektronike; Anyma, me performanca inovative vizuale dhe teknologjike; dhe Fatboy Slim, legjendë e muzikës elektronike. Ndër të tjerë, pjesëmarrës ishin edhe Calvin Harris, J Balvin, Martin Garrix, Action Bronson, Skepta, Burna Boy, Miley Cyrus, Bebe Rexha, Stormzy, Black Coffee, The Martinez Brothers dhe shumë të tjerë.

Festivali Sunny Hill po ashtu është nominuar për kategorinë e Festivaleve të Mesme në “European Festival Awards 2025”, duke vazhduar të konsolidojë pozitën e tij ndërkombëtare dhe ndikimin në skenën muzikore evropiane.