Studimi: Nivelet e stresit tek tifozët rriten 41% në ditët e ndeshjeve

Ethet e futbollit” nuk lidhen vetëm me emocionin e lojës apo disa birra para ndeshjes, por përbëjnë një reagim real fiziologjik të trupit. Një studim shkencor nga Universiteti i Bielefeldit në Gjermani dëshmon se tifozët përjetojnë rritje të ndjeshme të stresit gjatë ndeshjeve të rëndësishme.

Sipas të dhënave, niveli i stresit rritet mesatarisht me 41%, ndërsa rrahjet e zemrës kalojnë nga 71 në 79 rrahje në minutë në ditën e ndeshjes.

Ndikimi është edhe më i fortë te tifozët që ndjekin ndeshjen drejtpërdrejt në stadium, ku rrahjet e zemrës janë 23% më të larta krahasuar me ata që e shohin ndeshjen në televizor. Konsumi i alkoolit e përkeqëson këtë gjendje, duke shtuar rreth 5% rrahjet e zemrës.

Studiuesit paralajmërojnë se kombinimi i stresit emocional dhe alkoolit mund të rrisë rrezikun për probleme serioze shëndetësore, përfshirë aritmitë kardiake.

Studimi, i publikuar në revistën shkencore Scientific Reports, analizoi të dhënat e mbledhura nga orët inteligjente të 229 tifozëve të klubit gjerman Arminia Bielefeld, gjatë finales së Kupës së Gjermanisë 2025.

Monitorimi u krye nga 10 ditë para ndeshjes deri në 10 javë pas saj, duke treguar se stresi dhe rrahjet e zemrës rriteshin ndjeshëm para nisjes së lojës, arrinin kulmin në momentin e fillimit dhe mbeteshin të larta gjatë gjithë ndeshjes, madje edhe pas përfundimit të saj.

Së bashku me kërkime të tjera neurologjike, ky studim konfirmon se futbolli ndikon fuqishëm jo vetëm psikologjikisht, por edhe fiziologjikisht te tifozët, duke aktivizuar zona të trurit të lidhura me kënaqësinë, stresin dhe përpunimin emocional të fitores apo humbjes.