Shtëpia e Bardhë nis numërimin mbrapsht për 250-vjetorin e SHBA-së

Numërimi mbrapsht ka nisur. Shtëpia e Bardhë ka njoftuar se kanë mbetur vetëm pesë ditë deri në festimet e mëdha të 4 Korrikut, të cilat këtë vit do të shënojnë 250-vjetorin e themelimit të Shteteve të Bashkuara të Amerikës.

Përmes një postimi në llogarinë e saj zyrtare në X, White House e cilësoi këtë përvjetor si "festën më të madhe në historinë amerikane". Në mesazhin e publikuar, qytetarët ftohen të bëhen pjesë e një dite që pritet të jetë plot aktivitete festive.

Sipas njoftimit, programi do të përfshijë një nga shfaqjet më të mëdha të fishekzjarrëve, si edhe fluturime spektakolare të avionëve. Organizatorët e kanë përshkruar ngjarjen si një festë të veçantë për një "ditëlindje legjendare", duke premtuar një atmosferë madhështore në mbarë vendin.

Në fund të postimit, Shtëpia e Bardhë u bëri thirrje qytetarëve dhe vizitorëve të mos e humbasin këtë ngjarje historike. Festimet e këtij viti pritet të jenë ndër më të mëdhatë e organizuara ndonjëherë për Ditën e Pavarësisë së SHBA-së.