James Webb zbulon sekretin e “planetit rozë”, astronomët zgjidhin një mister 10-vjeçar

Për më shumë se dhjetë vjet, një botë e largët e njohur si “planeti rozë” ka mbetur një enigmë për astronomët. I vendosur rreth 57 vite dritë nga Toka, objekti i njohur si GJ 504 b ka qenë shumë i zbehtë për t’u studiuar me teleskopët tokësorë. Tani, falë James Webb Space Telescope, shkencëtarët kanë arritur të zbulojnë sekretet e atmosferës së tij.

Vëzhgimet e reja tregojnë se atmosfera e këtij objekti përmban avuj uji, metan, dioksid karboni dhe amoniak. Zbulimi më i rëndësishëm, megjithatë, është prania e reve të kripës, një fenomen që deri më tani kishte qenë vetëm një parashikim teorik. Studiuesit thonë se kjo është hera e parë që kanë prova të drejtpërdrejta për ekzistencën e tyre në një botë kaq të ftohtë.

Objekti u zbulua për herë të parë në vitin 2013 dhe vazhdon të sfidojë klasifikimin tradicional. Me një masë rreth 25 herë më të madhe se ajo e Jupiter, ai ndodhet në kufirin mes një planeti gjigant dhe një xhuxhi kafe. Për këtë arsye, astronomët e cilësojnë si një "shoqërues me masë planetare", ndërsa temperatura e tij, rreth 290 gradë Celsius, e bën një nga objektet më të ftohta të fotografuara ndonjëherë drejtpërdrejt.

Studimi u udhëhoq nga astronomi Aneesh Baburaj dhe u publikua në The Astronomical Journal. Sipas ekipit kërkimor, metodat e përdorura me James Webb mund të hapin rrugën për studimin e shumë botëve të tjera të ftohta dhe të largëta, duke ndihmuar shkencëtarët të kuptojnë më mirë atmosferat e planetëve jashtë Sistemit Diellor.