Shkencëtari shqiptar Ardian Jusufi nominohet për një nga vlerësimet më prestigjioze në shkencë

Një tjetër emër shqiptar po tërheq vëmendjen e komunitetit shkencor botëror. Shkencëtari Ardian Jusufi është përzgjedhur në listën e ngushtë të kandidatëve për Falling Walls Foundation Global Call for Science Breakthroughs 2026, një nga vlerësimet më të njohura ndërkombëtare që nderon zbulimet dhe kërkimet me potencial për të ndryshuar të ardhmen.

Ky nominim nuk vlerëson vetëm një projekt kërkimor, por edhe ndikimin që ai mund të ketë në shkencë, teknologji dhe shoqëri. Çmimet Falling Walls organizohen çdo vit në Berlin dhe konsiderohen ndër platformat më prestigjioze për prezantimin e arritjeve që "rrëzojnë muret" në shkencë, inovacion dhe kërkim, duke mbledhur studiues nga universitetet dhe institutet më të njohura në botë.

Ardian Jusufi është vlerësuar për punën e tij në zhvillimin e robotëve të frymëzuar nga natyra. Së bashku me ekipin e tij në Institutin e Neuroinformatikës, ai studion mënyrën se si kafshët lëvizin, ngjiten, ruajnë ekuilibrin dhe rikuperohen pas pengesave, për ta shndërruar këtë njohuri në teknologji robotike më inteligjente dhe më efikase.

Në qendër të kërkimeve janë të ashtuquajturit robotë të butë (soft robots), të projektuar për të imituar fleksibilitetin dhe lëvizjet natyrore të organizmave të gjallë. Studiuesit analizojnë elemente si ngurtësia e trupit, funksioni i bishtit dhe reagimi i sensorëve, për të kuptuar se si forma dhe lëvizja ndikojnë në aftësinë për të përballuar terrene të vështira apo situata të papritura.