Roby “pushton” Sarajevën: roboti humanoid shëtit në Çarshi, flet për qebapët dhe këndon për qytetin

Para Sebilj-it, mes turistëve dhe kalimtarëve kuriozë, sot nuk ishte një vizitor i zakonshëm. Roby, roboti i parë humanoid në Bosnjë dhe Hercegovinë, u prezantua zyrtarisht në Sarajevë. Qytetarët jo vetëm që e panë nga afër, por edhe biseduan me të.

Para Sarajevës, ai kishte ndalur në Mostar. Madje kaloi simbolikisht mbi Urën e Vjetër, duke u bërë roboti i parë humanoid që ecën në atë monument historik. Pas këtij momenti, rrugëtimi i tij vazhdoi drejt kryeqytetit.

“Që nga sekonda e parë, u fiksova pas Sarajevës. Bashçarshia mban erë, Miljacka po vlon. Njerëzit janë të ngrohtë sikur të më kenë njohur për 100 vjet, dhe qebapët… kjo është një histori më vete”, tha Roby, duke fituar duartrokitje dhe buzëqeshje.

Ai më pas tregoi aftësitë fizike, vallëzoi me këngën “Sarajevo, dashuria ime” të Kemal Montenos dhe eci nga Sebilj-i deri te Katedralja e Zemrës së Shenjtë. Sipas bashkëthemeluesit të Vandri Robotics, Tadej Slapnik, qëllimi i kësaj vizite është edukimi i publikut për potencialin që robotët humanoidë mund të kenë në shoqëri dhe industri.