Pesë ankesa ndaj rezultateve të zgjedhjeve, certifikimi i tyre mbetet në pritje

Procesi zgjedhor në Kosovë hyn në një tjetër fazë. Ka përfunduar afati për dorëzimin e ankesave ndaj rezultateve përfundimtare të zgjedhjeve të parakohshme për Kuvendin, të shpallura nga KQZ. Brenda këtij afati, në Panelin Zgjedhor për Ankesa dhe Parashtresa (PZAP) janë dorëzuar gjithsej pesë ankesa nga tri subjekte politike.

Dy ankesa janë paraqitur nga Partia Demokratike e Kosovës (PDK), e cila pretendon mungesë votash. Një ankesë është dorëzuar nga Lista Serbe, ndërsa dy të tjera nga Partia e Re Demokratike (Nova Demokratska Stranka – NDS). Këto të fundit lidhen me pretendime për parregullsi që kanë të bëjnë me fletëvotimet.

Zëdhënësi i KQZ-së, Valmir Elezi, tha se institucioni nuk do të komentojë përmbajtjen e ankesave derisa ato janë në shqyrtim. Ai theksoi se KQZ do t’i përgjigjet çdo kërkese të PZAP-it brenda afateve ligjore dhe do të ofrojë sqarimet e nevojshme për secilin rast.

Kjo do të thotë se certifikimi i rezultateve do të duhet të presë. Sipas KQZ-së, vetëm pasi PZAP-i dhe, nëse është e nevojshme, Gjykata Supreme të marrin vendimet përfundimtare dhe ato të zbatohen, mund të vazhdohet me certifikimin zyrtar të rezultateve të zgjedhjeve.