Pas 15 vitesh betejë ligjore: Stilistja Katie Perry fiton gjyqin kundër këngëtares Katy Perry

Një betejë ligjore që zgjati më shumë se 15 vjet mes stilistes australiane Katie Perry dhe yllit të popit Katy Perry ka përfunduar me vendimin e High Court of Australia në favor të stilistes. Gjykata vendosi se ajo mund të vazhdojë të përdorë emrin e markës së saj të modës, duke theksuar se nuk ekziston rrezik konfuzioni mes dy emrave.

Historia nisi në vitin 2009, kur stilistja kishte hapur sallonin e saj të parë të ekspozitës për markën e veshjeve Katie Perry, e themeluar dy vite më herët. Vetëm një ditë pas hapjes, ajo mori një letër paralajmëruese nga ekipi ligjor i këngëtares, ku i kërkohej të ndalonte shitjen e rrobave, të mbyllte faqen e internetit dhe të ndërpriste reklamat.

Pas përpjekjeve të pasuksesshme për marrëveshje jashtë gjykatës, çështja përfundoi në procese të gjata gjyqësore. Stilistja fillimisht fitoi të drejtën për përdorimin e markës për veshje, ndërsa pretendimet e këngëtares u kufizuan në fushën e muzikës dhe argëtimit. Megjithatë, konflikti u rikthye në vitin 2019, kur këngëtarja filloi të shiste edhe mallra dhe veshje me emrin e saj.

Pas një serie vendimesh të ndryshme në gjykata, çështja përfundoi në Gjykatën e Lartë të Australisë, e cila rrëzoi vendimin e mëparshëm dhe i dha të drejtë stilistes. Katie Perry u shpreh e lehtësuar, duke theksuar se beteja e saj ishte edhe për të treguar se ligji duhet të mbrojë jo vetëm korporatat e mëdha, por edhe bizneset e vogla.