Një udhëtim në kohën e discos: Disco Magic Band vjen në Sunny Hill Festival

Mjafton të dëgjosh tingujt e parë të "I Will Survive", "Le Freak", "YMCA", "Celebration", "Heart of Glass" apo "I'm So Excited" dhe atmosfera ndryshon menjëherë. Janë këngët që mbushën pistat e vallëzimit në fund të viteve '70 dhe gjatë viteve '80, u bënë himne të një brezi dhe vazhdojnë të dëgjohen edhe sot në festa e festivale në mbarë botën. Pikërisht këtë frymë do ta sjellë në Sunny Hill Festival 2026 grupi Disco Magic Band, i cili do ta kthejë për disa orë Prishtinën në një pistë gjigante vallëzimi.

Me bazë në Split të Kroacisë, Disco Magic Band është një nga grupet live më të njohura në rajon për interpretimin e hiteve klasike disco, funk dhe pop. Gjatë viteve, ata kanë realizuar mbi një mijë koncerte, duke ndërtuar reputacion si një grup që nuk ofron vetëm muzikë live, por një spektakël të plotë me energji, kostume shumëngjyrëshe, koreografi dhe atmosferën karakteristike të epokës së discos.

Në repertorin e tyre gjenden disa prej këngëve më ikonike të historisë së muzikës, mes tyre "I Will Survive" e Gloria Gaynor, "Le Freak" e Chic, "YMCA" e Village People, "Celebration" e Kool & The Gang, "Heart of Glass" e Blondie, "Hot Stuff" e Donna Summer, "We Are Family" e Sister Sledge dhe shumë hite të tjera që vazhdojnë të ndezin publikun edhe pas disa dekadash. Çdo performancë është ndërtuar si një udhëtim muzikor në epokën kur disko dominonte radiot, klubet dhe skenat më të mëdha në botë.

Në qendër të grupit është vokalistja Sugar Love, e shoqëruar nga muzikantë që performojnë me emra artistikë si Cool Daddy Jackson, Boogie Washington, Disco Rocket Dan, Stick Le Freak dhe Burning Bob Patterson. Ky identitet skenik, i kombinuar me paraqitjen vizuale dhe interpretimin live, e ka bërë Disco Magic Band një nga formacionet më të kërkuara për festivale, evente verore dhe mbrëmje tematike në Evropë.