Këshillat e AI po na bëjnë më të sigurt në vetvete, por po trefishojnë mundësinë e gabimeve

Pa ndihmën e AI, rreth 44% e pjesëmarrësve zgjodhën të përgjigjeshin me "nuk e di". Kur kishin në dispozicion chatbot-in, kjo përqindje ra në vetëm 3%.

Megjithatë, kjo nuk do të thoshte se përgjigjet ishin më të sakta. Përkundrazi.

Saktësia e përgjigjeve ra nga 27% në vetëm 9%, ndërsa niveli i vetëbesimit u rrit nga 30% në 76%. Me fjalë të tjera, pjesëmarrësit ishin shumë më të bindur se kishin të drejtë, pikërisht në momentin kur gabonin më shpesh.

Në disa raste, studiuesit vunë re edhe një fenomen edhe më interesant. Persona që, duke u mbështetur vetëm në njohuritë e tyre, do të kishin dhënë përgjigjen e saktë, ndryshuan mendim pasi panë përgjigjen e chatbot-it dhe përfunduan duke gabuar.

Për të parë nëse motivimi do të ndryshonte sjelljen, studiuesit ofruan edhe shpërblime financiare për përgjigjet e sakta. Edhe pse rezultatet u përmirësuan disi, ato mbetën dukshëm më të dobëta se te grupi që nuk përdori fare inteligjencën artificiale. Vetëm 8% e pjesëmarrësve pranuan të thoshin "nuk e di", ndërsa saktësia u rrit në 16%, ende larg nivelit të grupit pa AI.

Autorët e studimit e lidhin këtë sjellje me atë që quhet "dorëzim kognitiv". Ky fenomen ndodh kur njerëzit fillojnë t'ia delegojnë procesin e të menduarit teknologjisë dhe pranojnë përgjigjet e saj pa i vënë mjaftueshëm në dyshim.

Sipas tyre, problemi nuk është vetëm se njerëzit i besojnë shumë inteligjencës artificiale. Shqetësimi më i madh është se prania e saj mund të zbehë aftësinë për të vlerësuar kufijtë e njohurive personale dhe për të pranuar me sinqeritet: "Nuk e di."

Studiuesit nuk sugjerojnë që inteligjenca artificiale të shmanget. Përkundrazi, ata theksojnë se ajo mbetet një mjet shumë i vlefshëm, por duhet përdorur si ndihmë dhe jo si autoritet i padiskutueshëm. Verifikimi i informacionit, mendimi kritik dhe gatishmëria për të pranuar pasigurinë mbeten aftësi thelbësore në epokën e AI.