AI po trajnohet nga... AI?

Inteligjenca artificiale po zhvillohet me ritme të shpejta, por një praktikë që po përhapet në prapaskenë mund të ndikojë drejtpërdrejt në cilësinë e saj.

Sipas një investigimi të revistës New Scientist, një pjesë e punonjësve të angazhuar për trajnimin e modeleve të avancuara të AI po përdorin chatbot-e si ChatGPT për të kryer detyrat që duhet t'i realizojnë vetë. Kjo bie ndesh me rregullat e kompanive dhe ngre shqetësime për besueshmërinë e të dhënave që përdoren në zhvillimin e sistemeve të reja.

Në vitet e fundit, kompanitë e teknologjisë janë mbështetur gjithnjë e më shumë te përmbajtja e krijuar nga njerëzit për të përmirësuar modelet e inteligjencës artificiale. Bisedat, pyetjet dhe përgjigjet e përgatitura nga persona realë konsiderohen shumë më të vlefshme sesa të dhënat e mbledhura automatikisht nga interneti.

Megjithatë, sipas investigimit, shumë prej këtyre punonjësve janë të kontraktuar për periudha të shkurtra dhe paguhen relativisht pak. Për të përfunduar më shpejt detyrat dhe për të rritur produktivitetin, disa prej tyre përdorin mjete të AI për të gjeneruar përgjigje, të cilat më pas i përshtatin në mënyrë që të mos duken të krijuara nga një chatbot.