Këngët e Nexhmije Pagarushës rikthehen në një mbrëmje të veçantë në Prishtinë

Ka zëra që nuk zbehen me kohën. Ata vazhdojnë të jetojnë në çdo interpretim, në çdo kujtim dhe në çdo brez që i rizbulon. Njëri prej tyre është ai i Nexhmije Pagarushës, artistes që la një trashëgimi të jashtëzakonshme në muzikën shqiptare.

Për ta nderuar këtë trashëgimi, Rame Lahaj International Opera Festival (RLIOF) rikthen edhe këtë vit mbrëmjen tradicionale kushtuar repertorit të pavdekshëm të "Bilbilit të Kosovës". Koncerti do të mbahet më 14 korrik, duke filluar nga ora 20:30, në hapësirën e jashtme të Bibliotekës Kombëtare të Kosovës në Prishtinë, ndërsa hyrja do të jetë e lirë për të gjithë.

E kthyer tashmë në një nga traditat më të dashura të festivalit, kjo mbrëmje bashkon artistë të njohur të skenës shqiptare për t'i dhënë jetë këngëve që kanë shënuar historinë e muzikës sonë. Në edicionin e këtij viti do të interpretojnë Alma Bektashi, Liridon Sadriu, Malvina Likaj dhe Samir Shehu, të shoqëruar nga Pagarusha Band.

Publiku do t'i dëgjojë këngët e njohura të Nexhmije Pagarushës në aranzhime të reja të realizuara nga Shpëtim Saraçi, duke ruajtur frymën origjinale të repertorit, por duke i sjellë ato me një tingëllim bashkëkohor.