Historia e pavdekshme e Rozafës vjen për herë të parë si operë

Sonte, një nga rrëfimet më të njohura të trashëgimisë shqiptare do të marrë jetë në një formë krejtësisht të re artistike. Për herë të parë në histori, “Legjenda e Rozafës” do të shfaqet si operë, në premierën botërore që ngjitet në skenën e Teatrit Kombëtar të Operës, Baletit dhe Ansamblit Popullor, duke nisur në orën 20:00.

E frymëzuar nga një prej legjendave më të fuqishme të kulturës shqiptare, vepra sjell në një rrëfim skenik emocionin e mitit, historisë dhe muzikës. Me muzikë të Ndoc Pistullit, libret të Zef Zorbës dhe orkestracion nga Gridi Kraja, opera synon ta prezantojë historinë e Rozafës në një dimension të ri artistik.

Regjia dhe skenografia mbajnë firmën e Andis Gjonit, ndërsa në skenë do të interpretojnë sopranoja Nina Muho, baritoni Armando Likaj, si dhe Denis Skura, Solen Alla dhe Bledar Domi, të shoqëruar nga Orkestra Simfonike dhe Kori i TKOBAP.

Gjatë një interviste për emisionin ABC e Mëngjesit, artistët e konsideruan këtë produksion shumë më tepër se një shfaqje operistike. Sipas tyre, ai është një homazh për një nga simbolet më të rëndësishme të identitetit kulturor shqiptar, duke sjellë në skenë një histori që ka kaluar brez pas brezi përmes gojëdhënës.