Gjilani çel “Vjeshtën letrare” – 16 vite me fjalën e shkruar që mbledh krijuesit e Anamoravës

Në Gjilan ka nisur edicioni i gjashtëmbëdhjetë i manifestimit tradicional “Vjeshta letrare e Gjilanit”, që prej vitesh është bërë një strehë e fjalës së shkruar dhe krijimtarisë shqipe. Në hapje, u prezantuan veprat më të reja poetike dhe letrare të autorëve nga Anamorava, duke e kthyer sallën e Bibliotekës “Fan S. Noli” në një takim plot frymëzim dhe art.

Drejtori i bibliotekës, Qazim Azizi, e cilësoi këtë manifestim si ngjarjen më jetëgjatë letrare të qytetit, duke kujtuar se edhe themeluesi i saj, poeti Sabit Rrustemi, vështirë se do ta kishte imagjinuar një vazhdimësi kaq të qëndrueshme. “Çdo vit jemi befasuar me libra të rinj, monografi, romane e botime biografike që pasurojnë kujtesën tonë letrare,” tha Azizi.

Poezitë e Din Mehmetit u rikthyen në skenë përmes zërit të krijueses së re Blinerë Hajdari, ndërsa autorë si Avdush Canaj, Ramadan Mehmeti, Sabit Rrustemi e Sherafedin Kadriu prezantuan botimet e tyre të fundit. Kritikë të njohur si Prend Buzhala e Nexhat Rexha ndanë vlerësime për veprat e reja që i japin letërsisë shqipe një frymë të freskët e të përkushtuar.

“Vjeshta letrare” do të vazhdojë me aktivitete të tjera gjatë javëve në vijim, me takime, përurime dhe lexime poetike në Bibliotekën “Fan S. Noli”, duke mbajtur gjallë traditën që e ka bërë Gjilanin një qendër të fjalës poetike në Kosovë.