Fest 64 vazhdon me natën e dytë konkurruese: 14 artistë në skenë dhe surpriza të veçanta

Festivali i Këngës 64 vijon sonte me natën e tij të dytë konkurruese, një mbrëmje që premton emocione, talent dhe surpriza të veçanta për publikun.

Prezantuesja e festivalit do të hapë mbrëmjen me një moment artistik të veçantë, ndërsa 14 artistë do të interpretojnë këngët e tyre, duke sjellë ngjyra të ndryshme muzikore dhe ritme emocionuese.

Autorja e festivalit, Belioza Çoku, ka paralajmëruar se skena do të ndriçohet nga prania e një artisteje shqiptare me jehonë ndërkombëtare, e cila do të mahnisë publikun me interpretimin e saj, ndërsa një tjetër surprizë speciale do të përmbyllë mbrëmjen.

Në dy netët konkurruese, juria e përbërë nga Belinda Budini, Valentin Veizi, Anila Basha, Zef Çoba, Olen Çezari, Bleona Qereti dhe Ramë Lahaj do të përzgjedhë dhjetë këngët që do të avancojnë në natën finale.

Fituesi i Festivalit do të vendoset nga kombinimi i 50 % votave të jurisë dhe 50 % votave të publikut, duke fituar të drejtën për të përfaqësuar Shqipërinë në Eurovision.

Nata e parë solli performanca të paharrueshme nga Rigersa Loka, Lorenc Hasrama, Sara Kapo, Sheila, Kleansa Su sa, Gresa Gjoçera, Bledi Kaso, Rezarta Smaja, Ghiti, Lynx, Erand Sojli, Inis Neziri, Kimi, Alis dhe Enxhi Nasufi.

Momente të forta emocionale ofroi moderatorja Arilena Ara me monologun e saj për nënën, ndërsa energjinë dhe dinamizmin e sjellën Kroni Pula dhe Vlashent Sata me performancat e tyre.

Festivali i Këngës 64 vijon të mbetet një ngjarje e rëndësishme kulturore dhe artistike, duke shpalosur talentin e artistëve dhe duke ofruar momente të paharrueshme për të gjithë adhuruesit e muzikës.

Fituesi i këtij festivali do të përfaqësojë Shqipërinë në Eurovision Song Contest 2026, i cili do të mbahet në Vjenë, Austri në muajin maj 2026 me finalen kryesore më 16 maj 2026 dhe dy gjysmëfinalet më 12 dhe 14 maj 2026 në Wiener Stadthalle – arenë e madhe e kryeqytetit austriak.

Deri më tani janë konfirmuar 35 shtete pjesëmarrëse në këtë edicion të Eurovision-it, duke reflektuar një pjesëmarrje të gjerë nga e gjithë Europa dhe më gjerë.