Evropa shqyrton kufizimet për fëmijët në rrjetet sociale pas modelit australian

Pas Australisë, e cila në dhjetor ndaloi përdorimin e rrjeteve sociale për fëmijët nën 16 vjeç, vendet evropiane po shqyrtojnë hapa të ngjashëm për të mbrojtur fëmijët në botën digjitale. Franca, Spanja, Italia, Greqia dhe Gjermania janë në faza të ndryshme të diskutimeve ligjore, duke synuar kufizime të moshës dhe mekanizma kontrolli prindëror.

Në Danimarkë, qeveria planifikon të ndalojë qasjen në rrjetet sociale për ata nën 15 vjeç dhe po zhvillon një aplikacion për verifikimin e moshës. Në Francë, një projektligj i ri pritet në fillim të vitit 2026, ndërsa Spanja shqyrton kufizimin e hyrjes në çdo platformë që përdor inteligjencë artificiale për fëmijët nën 16 vjeç.

Italia po trajton kufizime për fëmijët nën 15 vjeç dhe ndikuesit e vegjël në rrjetet sociale, ndërsa Greqia, pas ndalimit të telefonave në klasë, po analizon efektet e mundshme të një ndalimi të ngjashëm. Edhe Gjermania po studion ndikimin e rrjeteve sociale mbi adoleshentët dhe po shqyrton vendosjen e një moshe minimale ligjore për përdorim.

Ekspertët dhe politikanët evropianë thonë se këto kufizime synojnë mbrojtjen e fëmijëve nga përmbajtje të dëmshme dhe përdorimi i parregullt i rrjeteve sociale, duke u bazuar te modeli australian që vendosi gjoba të ashpra për platformat që shkelin ligjin. Evropianët po shohin me kujdes se si teknologjia dhe ligji mund të bashkëjetojnë për të krijuar një mjedis më të sigurt për fëmijët.